يا مدعيها دونها علوم صعيبات المنال
ماهيب حيّا الله تجي كذا مثل ما يدعون
وان قلت يمكن انّها توصل الى الشي المحال
ما هي غريبة في زمان اللي معه قرش يمون
واللي يعيش بعزة النفس الكريمة دون مال
ما له مكان وان تكلم يخزرونه بالعيون
المرجلة ما هي رصيد يملكه بعض الرجال
يا كم رصيد ما كسب راعيه غير الكارهون
ولا هيب بالمنصب تجي لالا حشا يا همًلال
كم منصب ما جمَل اصحابه ولا هم يحزنون
ولاهي بلبس الثوب والغتره وتنكيس العقال
ولا هي بلبس البشت بين الخلق من فوق المتون
وعند الشباب إلها مفاهيم قريبه للهبال
تقليد أعمى للسلوم الخايبة هم يتبعون
البعض منهم يعجبك هرجه ويعجبك القبال
والى تقصيت الخبر خابت محاسين الظنون
مفهومها مغلوط عند اللي يعيشون الخيال
يدعيهم الشيطان بافكاره وهم له سامعون
شي يحزّن لا لمحت اللي لهم قيل وقال
يمشون في درب الخطأ من باب خالف تعرفون
سبحانك اللهم يارب حليم ما يزال
يحلم على خلقه ولو كانوا لفضله جاحدون
يا ناس يا عالم ترى الدنيا نهايتها الزوال
المشكلة ندري ولكنّا المصيبة غافلون
مانيب اعمم مايزال الخير واجد ما يزال
لكن هذا واقعٍ والناس معنا شاهدون
المرجله للي يطيع الله ما فيها جدال
يا لله يا ربي عسانا دايمٍٍ لك طايعون
ماني معلمكم بها لكن من باب المقال
ذكر ترى الذكر تفيد اهل العقول المومنون
وسلامة روسكم
الثلاثاء مارس 18, 2008 11:09 pm
